Təqribi çatma vaxtı
22 Noyabr 09:28:51
ADY Express şirkəti 20-22 noyabr tarixlərində İstanbulda keçirilən «Logitrans Türkiye 2024» sərgisində iştirak edib. Bu əhəmiyyətli tədbir, logistika və yükdaşımalarla məşğul olan şirkətləri və ziyarətçiləri bir araya gətirərək, nəqliyyat və logistika xidmətləri sahəsində müzakirələr aparıldığı, regionun ən böyük platformalarından biri sayılır. Bu il «Logitrans Türkiye» Yenikapı Avrasiya Sərgi və Sənət Mərkəzində keçirilib və 16 000-dən çox ziyarətçi cəlb edərək, təcrübə mübadiləsi və yeni biznes əlaqələrinin qurulması üçün geniş imkanlar təqdim edib.
ADY Express sərgidə multimodal və intermodal xidmətlər də daxil olmaqla logistika və nəqliyyat imkanlarını təqdim edib, bu da ekspeditorlar və biznes nümayəndələri arasında geniş maraq doğurub. Şirkət nümayəndələri potensial tərəfdaşlarla görüşlər keçirib və Azərbaycan ərazisindən yükdaşımalar xidmətlərinin təbliği və beynəlxalq əməkdaşlığın genişləndirilməsi istiqamətində müzakirələr aparıblar.
Bundan əlavə, ADY Express-in direktoru Akbar Mədatlı sərgi çərçivəsində keçirilən və “Transxəzər Beynəlxalq Nəqliyyat Marşrutu” (TBNM) Beynəlxalq Assosiasiyası tərəfindən təşkil olunmuş konfransda iştirak edib. Öz çıxışında, O, Bakı-Tbilisi-Qars (BTQ) dəmir yolu xətti ilə yükdaşımaların həyata keçirilməsi haqqında geniş məruzə edib. Şirkət rəhbəri Bakı-Tbilisi-Qars marşrutunun Asiya və Avropa arasında yükdaşımalar üçün strateji əhəmiyyətini vurğulayıb, bu marşrutun Orta Dəhlizin bir hissəsi olaraq nəqliyyat xərclərini və çatdırılma vaxtını azaltmağa imkan verdiyini qeyd edib. Həmçinin marşrut boyunca infrastrukturun modernləşdirilməsi işləri haqqında məlumat verilib. Bildirilib ki, aparılan işlər BTQ vasitəsi ilə illik 5 milyon ton yükün nəql edilməsinə və tranzit vaxtının azalmasına səbəb olur.
Qeyd edək ki, şirkətin sərgidə iştirakı ADY Express-in beynəlxalq tərəfdaşlarla daha sıx əməkdaşlıq etməyə və əlaqələri gücləndirməyə hazır olduğunu, eləcə də beynəlxalq müstəvidə rəqabət qabiliyyətini artırmaq üçün logistika xidmətlərini təkmilləşdirmək istiqamətində gördüyü işləri nümayiş etdirib.
